Gwybodaeth i Staff a Myfyrwyr y Coleg Cymraeg Cenedlaethol
Mae apiau Android ac Apple ar gael yn rhad ac am ddim sy’n rhoi mynediad llawn i Eiriadur Prifysgol Cymru (GPC), y geiriadur hanesyddol Cymraeg sy’n cyfateb i’r Oxford English Dictionary. Mae hwn yn waith enfawr o dros 9 miliwn o eiriau i gyd. Mae’n anhepgorol i bawb sy’n astudio’r Gymraeg a’i llenyddiaeth gyfoethog, ond mae hefyd yn ddefnyddiol iawn mewn llawer o feysydd eraill.
Ceir diffiniadau yn Gymraeg yn ogystal â chyfystyron Saesneg, a dyfyniadau yn dangos defnydd y gair dros y canrifoedd. Rhestrir cyfuniadau cyffredin sy’n cynnwys y gair, gan gynnwys nifer o dermau technegol. Mantais fawr y fersiwn electronig yw bod modd chwilio am air Saesneg yn y Geiriadur, peth sy’n amhosibl gyda’r cyfrolau printiedig. Mae’n bosibl chwilio am gyfuniadau a rhannau o eiriau drwy ddefnyddio nodau chwilio arbennig (‘wildcards’). Ceir cymorth gyda sillafiad geiriau: oni ddeuir o hyd i air, cynigir rhestr o eiriau tebyg. Hefyd dangosir holl ffurfiau treigledig gair yn y canlyniadau chwilio, felly bydd chwilio am ‘cefn’ hefyd yn dod o hyd i ‘ar gefn ei geffyl’.
Ystyrir GPC yn safon ar gyfer sillafu geiriau, ffurfiau lluosog, cenedl enwau, ac yn y blaen. Mae’r holl wybodaeth yn y Geiriadur yn seiliedig ar gorpws o enghreifftiau go iawn.
Er Mehefin 2014 mae GPC Ar Lein ar gael dros y We. Mae ap ar gael hefyd i’ch ffôn neu’ch tabled (Apple neu Android).
Mae’r ap yn gyflym ac yn gyfleus. Mae tipyn o gymorth ar gael ynddo gan gynnwys cyngor ar sut i ddyfynnu o’r Geiriadur yn eich gwaith academaidd.
Gallwch lawrlwytho’r ap drwy glicio ar yr eicon App Store Apple neu Google Play yma neu drwy sganio’r cod QR gyda’ch dyfais:
Cymorth gyda’r ap:
Am ragor o wybodaeth ac atebion i gwestiynau cyffredin cliciwch yma neu ar y ddolen Cymorth gyda’r Ap yn y ddewislen ar y dde.
I ddysgu rhagor:
Ceir rhagor o wybodaeth am Eiriadur Prifysgol Cymru ar wefan y Coleg Cymraeg Cenedlaethol yn y Porth yn:
Ysgrifau ar Ieithyddiaeth a Geiriaduraeth Gymraeg, gol. Delyth Prys (2014), pennod IV: ‘Geiriadur Prifysgol Cymru: Ar Seiliau Cadarn? Geiriaduron Hanesyddol, Disgrifiadol, a Rhagnodol’ gan Andrew Hawke.
Ysgrifau a Chanllawiau Cyfieithu, gol. Delyth Prys a Robat Trefor, pennod 3: ‘Geiriaduron, termiaduron ac adnoddau defnyddiol eraill’ gan Delyth Prys.
Ar gyfer geirfa sy’n benodol i faes astudiaeth arbennig, bydd Ap Geiriaduron Canolfan Bedwyr yn ddefnyddiol a hefyd Porth Termau Cenedlaethol Cymru.
Datblygwyd yr ap gyda chymorth ariannol Llywodraeth Cymru.










